भारतमा कोरोना संक्रमितको संख्या बढ्दै : ३१ मा देखियो संक्रमण
एजेन्सी । चीनबाट फैलिएको कोरोना भाइरसले विश्वमा नै महामारीको रुप लिइरहेको छ । यतिवेला कोरोनाको संक्रमण भारतमा पनि बढ्दो छ ।
भारतमा कोरोना भाइरसबाट संक्रमित हुनेको संख्या ३१ पुगेको छ । आज दिल्लीमा थप एक जनामा कोरोनाको संक्रमण देखिएको छ । स्वास्थ्य मन्त्रालयका विशेष सचिव सञ्जीव कुमारका अनुसार संक्रमित व्यक्ति थाइल्यान्ड र मलेसियाको यात्राबाट फर्किएका थिए । उनी दिल्लीको उत्तम नगरका बासिन्दा हुन्।
भारतका ६ सहरमा ३१ जना संक्रमित भेटिएका हुन् । केरलमा चीनको वुहानबाट फिर्किएका तीनजनामा कोरोना भाइरस भेटिएको हो। तर, उनीहरू सन्चो भइसकेका छन् ।
राजधानी सहर दिल्लीमा इटाली र मलेसियाबाट फर्किएका दुईजना कोरोना भाइरस संक्रमित पाइएका हुन् । दुवैको उपचार भइरहेको छ । उत्तर प्रदेशको आगरामा ६ जना कोरोना भाइरस संक्रमित भेटिएका छन् । इटालीबाट फर्किएका एकजना व्यक्तिले अन्य पाँचजनालाई संक्रिमत बनाएका हुन् ।
तेलंगानामा पनि इटालीबाट फर्किएकालाई कोरोना संक्रमण भएको छ । उनको सम्पर्कमा आएका अन्य ८८ जनालाई निगरानी गरिएको छ । राजस्थानको जयपुरमा १७ जना विरामी भेटिएका छन् । यिनमा १६ जना इटालीबाट आएका हुन् । उनीहरु राजस्थानको ६ जिल्लामा ८ दिनसम्म घुमेका थिए ।
यहाँ जम्मा भारतीय ड्राइभरसहित १७ जना संक्रमित भेटिएका हुन् । दिल्लीकै गुडगाउँमा अर्का संक्रमित भेटिएका छन् । पेटिएम कम्पनीका एक कर्मचारी संक्रमित पाइएका हुन् । उत्तर प्रदेशको गाजियाबाद एक व्यापारीलाई पनि कोरोना संक्रमण भएको छ ।