Suvadin, Home
सार्वजनिक यातायातले ठक्कर दिएर करङ भाँचिदिएको सात वर्ष बित्दासमेत कागेश्वरी मनोहरा नगरपालिकाका न्हुच्छे नगरकोटीले उपचार पाएका छैनन्। वि.सं. २०६६ माघ २७ गते दुई पर्यटक लिएर पोखरा जाँदा पृथ्वीराजमार्गस्थित धादिङको ज्यामिरघाटमा नगरकोटीले चलाएको फिस्टेल टुर्स एन्ड ट्राभल्सको बा४च ४५३१ नम्बरको किया क्यारिन्स कारलाई काठमाडौं आउँदै गरेको लमजुङ कालिका माइक्रोबस समितिको बा३ख ३१५१ नम्बरको माइक्रोबसले ठक्कर दिएर सख्त घाइते बनाएको थियो।
कागेश्वरी मनोहरा–२ आलापोटस्थित आफ्नै घरमा अनशन बस्दै न्हुच्छे नगरकोटी । तस्बिर : पूर्णप्रसाद मिश्र/रासस

काठमाडौं, वैशाख ३- सार्वजनिक यातायातले ठक्कर दिएर करङ भाँचिदिएको सात वर्ष बित्दासमेत कागेश्वरी मनोहरा नगरपालिकाका न्हुच्छे नगरकोटीले उपचार पाएका छैनन्।

वि.सं. २०६६ माघ २७ गते दुई पर्यटक लिएर पोखरा जाँदा पृथ्वीराजमार्गस्थित धादिङको ज्यामिरघाटमा नगरकोटीले चलाएको फिस्टेल टुर्स एन्ड ट्राभल्सको बा४च ४५३१ नम्बरको किया क्यारिन्स कारलाई काठमाडौं आउँदै गरेको लमजुङ कालिका माइक्रोबस समितिको बा३ख ३१५१ नम्बरको माइक्रोबसले ठक्कर दिएर सख्त घाइते बनाएको थियो। सात वर्षसम्म आफू कार्यरत ट्राभल्स, माइक्रोबस समितिलगायत सरोकार भएका निकायमा धाउँदा पनि न्याय नपाएपछि राष्ट्रिय मानवअधिकार आयोगमा उजुरी दिइएको उनले बताए।

अशक्त नगरकोटी हाल सो नगरपालिकाको वडा नम्बर २ आलापोटस्थित आफ्नै घरमा अनशन बस्दै आएका छन्। नेपाल घुम्न आएका सिङ्गापुरको एक दम्पती लिएर पोखरा फर्कंदा उनी मात्र नभई पर्यटक पनि सख्त घाइते भएका थिए। महिला पर्यटक गोडा नचल्ने अवस्थामा ह्विलचियरमा स्वदेश फर्केकी थिइन्। ‘ट्राभल्सका सञ्चालक नारायणप्रसाद पोखरेलले माइक्रोबस समितिसँग पैसा लिई कारको मर्मत गरे पनि मेरो उपचारका लागि केही गरेनन्, अहिले त भेट्न पनि मान्दैनन्, फोन पनि उठाउँदैनन्,’ पीडित नगरकोटीले भने।

बिएन्डबी अस्पतालमा प्रारम्भिक उपचारपछि डा. सरोज रिजालले करङको शल्यक्रिया गर्न सिफारिस गरे पनि आर्थिक अवस्था कमजोर भएका कारण गर्न नसकेको उनको गुनासो छ। उनी हालसम्म नेपाल अर्थोपेडिक अस्पताल, वीर अस्पताल र मेडिकेयर अस्पतालमा उपचारका लागि धाइसकेका छन्। सबै अस्पतालले करङको नसाको समस्या भएकाले न्युरो अस्पतालमा डा. उपेन्द्र देवकोटालाई भेट्न सल्लाह दिए पनि तीन वर्षदेखि भेट्न नसकेको दुःखेसो उनको छ।

ट्राभल्सका सञ्चालक पोखरेल दुर्घटनामा चालक नगरकोटी घाइते नै नभएको जिकिर गर्छन्। माइक्रोबस समितिका कोषाध्यक्ष दिलबहादुर घिमिरे भने चालक घाइते भई करङमा समस्या देखिए पनि उपचार खर्च भएअनुसारको पैसा दिन खोज्दा नमानेको बताउँछन्। रासस


 

More form the Internet

loading...