माफि मागेपछि गायक दुर्गेश थापा रिहा
काठमाण्डौ । मोडल तथा गायक दुर्गेश थापा रिहा भएका छन् । युट्युबबाट गीत हटाएसँगै प्रहरीले थापालाई रिहा गरेको हो ।
तिहारको देउसी भैलो गीतमा थापाले समाजलाई भड्किलो बनाउने खालका शब्द राखेको भन्दै उनीविरुद्ध उजुरी परेको थियो ।
जिल्ला प्रशासन कार्यालयमा उजुरी परेको र प्रशासन कार्यालयले महानगरीय अपराध अनुसन्धान महाशाखालाई पत्राचार गरेपछि बालाजुबाट प्रहरीले थापालाई पक्राउ गरेको थियो ।
महाशाखामा थापाले आफूले निकालेको गीतमा अञ्जानबस नशालु पदार्थ गाँजा खान प्रोत्साहन गर्ने शब्द परेको भन्दै माफि मागेका थिए । उनले आगामी दिनमा पनि समाजमा असर पर्ने खालका गीत नबनाउने प्रतिवद्धता व्यक्त गरेका थिए ।
थापाले युट्युबबाट गीत हटाएपछि उनलाई रिहा गरिएको प्रहरीले जनाएको छ ।