दुई जिप पहिरोले पुर्यो, एकको मृत्यु
पाल्पा । सिद्धार्थ राजमार्ग अन्तर्गत पर्ने बुटवल–पाल्पा सडक खण्डको सिद्धबाबा–दोभान हेडवर्क्स नजिकै सडक माथिबाट खसेको पहिरोले शुक्रबार २ जिप पुरेको छ ।
पहिरोमा परि एक जनाको ज्यान गएको छ भने छ जना घाइते भएका छन् ।
दोभान प्रहरी चौकीका अनुसार बुटवलबाट गुल्मीतर्फ जाँदै गरेको लु १ ज २६१७ नं. जिप र पाल्पाबाट बुटवलतर्फ आउँदै गरेको लु २ च ८४७६ नं. को स्कारपियोलाई सडकमाथिबाट खसेको ढुंगासहितको पहिरोले पुरेको हो ।
पहिरोमा पुरिएर जिप चालक रुपन्देही मक्रहरका २६ वर्षीय कमल परियारको मृत्यु भएको छ । घाइतेहरूलाई उपचारका लागि बुटवलमा ल्याइएको छ । पहिरोले अवरुद्ध राजमार्ग संचालन भएको छ ।
जिपमा चालकसमेत चारजना थिए ।