Suvadin, Home
Bridge Water

प्रधानमन्त्रीलाई धन्यवाद दिँदै पत्र बुझाएर सरकारबाट हट्याे माओवादी केन्द्र!

विनाविभागीय मन्त्री पोखरेलले पार्टी अध्यक्षकोतर्फबाट हस्ताक्षरित पत्र बुझाएर आफूहरु औपचारिक रुपमा सरकारबाट बाहिरिएको जानकारी दिएका छन्। आफूहरु सरकारमा रहिरहनु औचित्यपूर्ण नदेखिएकाले माओवादी केन्द्र र नेकपा संयुक्त सम्बद्ध मन्त्रीलाई फिर्ता बोलाइ सरकारमा नरहेको जानकारी गराएको पत्रमा उल्लेख छ।
मन्त्रिपरिषद् बैठक। फाइल तस्वीर

काठमाडौं, २८ पुस – नेकपा माओवादी केन्द्र औपचारिक रुपमै शुक्रबारदेखि शेरबहादुर देउवाको नेतृत्वको गठबन्धन सरकारबाट बाहिरिएको छ। 

प्रधानमन्त्री तथा मन्त्रिपरिषद् कार्यालयमा प्रधानमन्त्री देउवासँग भेट गरी विनाविभागीय मन्त्री गिरिराजमणि पोखरेलले पार्टी अध्यक्ष पुष्पकमल दाहाल प्रचण्डको हस्ताक्षरसहितको पत्र बुझाएर सरकार छाडेको जानकारी गराएका हुन्। 

निर्वाचनको सुनिश्चितताका लागि भन्दै विनाविभागीय हैसियतमा माओवादी केन्द्रका तर्फबाट उपप्रधानमन्त्रीसहित नौ जना मन्त्री देउवा नेतृत्वको सरकारमा सहभागी थिए। 

विनाविभागीय मन्त्री पोखरेलले पार्टी अध्यक्षकोतर्फबाट हस्ताक्षरित पत्र बुझाएर आफूहरु औपचारिक रुपमा सरकारबाट बाहिरिएको जानकारी दिएका छन्।

आफूहरु सरकारमा रहिरहनु औचित्यपूर्ण नदेखिएकाले माओवादी केन्द्र र नेकपा संयुक्त सम्बद्ध मन्त्रीलाई फिर्ता बोलाइ सरकारमा नरहेको जानकारी गराएको पत्रमा उल्लेख छ। 

माओवादी केन्द्रले सरकारबाट नयाँ जनादेशअनुसार सत्ता हस्तान्तरणमा सहजीकरणको लोकतान्त्रिक भूमिकाको समेत अपेक्षा गरेको छ। 

गत असोज १७ गते नेकपाएमालेसँग वाम गठबन्धनअन्तर्गत प्रतिनिधिसभा र प्रदेशसभाको निर्वाचनमा सहकार्य गरेको, पार्टी एकताको प्रक्रियासमेत शुरु भएको अध्यक्ष दाहालको पत्रमा उल्लेख छ। 

वाम गठबन्धन र एकताको प्रक्रियाले निर्वाचन सम्पन्न गर्ने राष्ट्रिय कार्यभारमा बाधा नपुगोस् भनेर आफूहरु सरकारमा बसिरहेको जानकारी दिँदै माओवादी केन्द्रले संघीय संरचनाअनुसार तीनवटै तहको निर्वाचन सम्पन्न भइसकेको भन्दै उक्त कार्य सफलतापूर्वक सम्पन्न गराएकामा प्रधानमन्त्री देउवालाई धन्यवादसमेत दिएको छ।