Suvadin, Home

'नेपालका सबैथोक आफ्नै जस्तो, सबै आफन्त जस्तै'
नेपालबिना भारतको आस्था, विश्वास र इतिहास अधुरोः नरेन्द्र मोदी

भारतीय प्रधानमन्त्री मोदीले प्रदेश नं २ को सरकार र जनकपुर उपमहानगरपालिकाद्वारा आज जनकपुरको ऐतिहासिक बाह्रबिघा रंगभूमि मैदानमा आयोजित नागरिक अभिनन्दन समारोहलाई सम्बोधन गर्दै उक्त कुरा बताएका हुन्। मोदीले नेपालीहरुको हृदय सागरभन्दा पनि गहिरो र नेपालको स्वाभिमान सगरमाथाभन्दा पनि उच्च रहेको बताए। उनले भने, 'नेपाल र भारतको आत्मियता यो क्षेत्र (मिथिला)को सांस्कृतिक आस्थाले सिञ्चित रहेको छ।'
नरेन्द्र मोदी।

जनकपुरधाम, २८ वैशाख – भारतीय प्रधानमन्त्री नरेन्द्र मोदीले नेपालबिना भारतको आस्था, विश्वास र इतिहास अधुरो भएको बताएका छन्। 

भारतीय प्रधानमन्त्री मोदीले प्रदेश नं २ को सरकार र जनकपुर उपमहानगरपालिकाद्वारा आज जनकपुरको ऐतिहासिक बाह्रबिघा रंगभूमि मैदानमा आयोजित नागरिक अभिनन्दन समारोहलाई सम्बोधन गर्दै उक्त कुरा बताएका हुन्। 

मोदीले नेपालीहरुको हृदय सागरभन्दा पनि गहिरो र नेपालको स्वाभिमान सगरमाथाभन्दा पनि उच्च रहेको बताए। उनले भने, 'नेपाल र भारतको आत्मियता यो क्षेत्र (मिथिला)को सांस्कृतिक आस्थाले सिञ्चित रहेको छ।'

मोदीले विश्वमा मिथिला सांस्कृतिको आख्यान सबैभन्दा माथि रहेको बताउँदै विद्यापतिका रचनाहरु दुवै देशमा समान रुपले महत्व राखेको उल्लेख गरे। उनले मिथिला चित्रकला विश्वमा प्रसिद्ध रहेको बताउँदै सो कलामा प्रस्तुत गरिएको परिवेश महिला सशक्तीकरण तथा जलवायु परिवर्तन र पर्यावरणीय सचेतनालाई परिलक्षित गरिरहेको बताए।

नेपाल–भारतको मित्रता त्रेता युगदेखि नै रहँदै आएको स्मरण गर्दै उनले मोदीले आस्था, अपनत्व, रोटी बेटीको सम्बन्धले नेपाल–भारतको सम्बन्धलाई अझ प्रगाढ बनाएको बताए।

उनले राम जानकीको सम्बन्ध बिना अयोध्या अधुरो रहेको बताउँदै नेपाल–भारतका जनताको सुख र चुनौती तथा सपना र संकल्प पनि एउटै भएकाले दुवै देश मिलेर यसको सामना गर्नुपर्ने आवश्यकता रहेको उल्लेख गरे। 

भारतीय प्रधानमन्त्री मोदीले आफ्नो यो भ्रमण प्रधानमन्त्रीका रुपमा भन्दा पनि प्रधान तीर्थयात्रीका रुपमा भएको बताउँदै धार्मिक यात्राका क्रममा रामेश्वरम्बाट पशुपतिनाथ आउनुपर्ने र लुम्बिनीबाट बोधगया तथा अवधबाट जनकपुर पुग्नुपर्ने परम्पराअनुसार आफू पनि तीर्थ यात्रीका रुपमा जनकपुर आइपुगेको उल्लेख गरे। 

मोदीले नेपाल अध्यात्म दर्शनको केन्द्र रहेको बताउँदै भने, 'यहाँका सबैथोक आफ्नै जस्तो छ, सबै आफन्त जस्तै छन्।' उनले नेपाल–भारत दुवै देशको नारी चेतनाका लागि माता सीता गंगोत्रीका रुपमा रहेको बताउँदै काठमाडौंदेखि कन्याकुमारीसम्म माता सीताको चरित्र प्रेरणादायी रहेको उल्लेख गरेका छन्। 

उनले भने, 'राजा जनकको दरबारमा गार्गीजस्तो विदुषी र अष्टाबक्रजस्ता विद्वान्हरुको समूहले लोककल्याणकारी नीति बनाई जनतालाई सर्वोपरी ठानी राजकाज सञ्चालन गरेको भूमि हो मिथिला।' 

मोदीले भारत चाँडै नै विश्वको तेस्रो अर्थव्यवस्थाको देश हुन गइरहेकाले जसरी भारत आर्थिक रुपले समृद्ध हुने र नेपालको विकासको गति पनि तीव्र हुने बताए। 

भारतीय प्रधानमन्त्री मोदीले नेपालमा हालै सम्पन्न भएको संघीय, प्रान्तीय र स्थानीय निर्वाचन यस क्षेत्रमै उदाहरणीय भएको उल्लेख गरेका छन्। 

उनले नेपालको विकासमा क्षेत्रीय विकासको सूत्र जोडिएको हुँदा अब नेपालको विकास तीव्र गतिमा हुने विश्वास व्यक्त गर्दै विद्युत्, रेल, भन्सार, चेकपोष्ट, हवाई सेवा, जलमार्गको विकास पनि नेपालसँग जोड्नु पर्ने बताए। 

अहिले जयनगर–जनकपुर रेल्वेको काम तीव्र गतिमा भइरहेको र केही दिनमै उक्त रेल सेवा सञ्चालन हुने बताउँदै मोदीले भने, 'रक्सौलबाट काठमाडौँका लागि रेल सेवासमेत सञ्चालन गरिनेछ।' साथै उनले मोतिहारीबाट अमलेखगञ्जसम्म पाइपलाइनबाट पेट्रोलियम पदार्थ ल्याउने कार्यसमेत भइरहेको बताए। 

भारतीय प्रधानमन्त्री मोदीले जनकपुर र आसपासका क्षेत्रको विकासका लागि १०० करोड सहायता दिने घोषणासमेत गर्दै प्रदेश सरकार र केन्द्र सरकारसँग समन्वय गरेर परियोजना छनोट गर्ने बताए। उनले भने, 'यो १०० करोड भारतीय जनताको तर्फबाट माता जानकीलाई समर्पण रहेको छ।'

साथै, उनले जनकपुरलाई रामायण सर्किटमा समावेश गर्ने दिशामा भारत सरकार उन्मुख रहेको बताउँदै माता सीता र भगवान् रामले पाइला टेकेका धार्मिक स्थललाई समेटेर यसको विकास गर्न भारतीय सरकार अग्रसर रहेको बताए। उनले बुद्ध सर्किट र जैन सर्किटको विकासका लागि पनि आफू क्रियाशील रहेको बताए।

मोदीले भारतद्वारा निर्मित स्याटेलाइटले साउथ एशियामा आफ्नो काम गरिरहेको उल्लेख गर्दै नेपाललाई समेत फाइदा पुगेको हुँदा यो क्षेत्रमा पनि नेपालले विकास गर्नुपर्ने धारणा व्यक्त गरे।
उहाँले सन् २०१४ मा नेपाल आएका बेला संविधानसभामा जनकपुर जाने प्रतिबद्धता व्यक्त गरेअनुरुप आज राजा जनकको राजधानी तथा जनक जननी सीताको भूमिमा आउने धोको पूरा भएकामा जीवन धन्य भएको बताए।

उनले जनक जननी जानकी माताको यो भूमि दिव्य, भव्य र शान्ति प्रक्रियाका द्योतकका रुपमा रहेकाले सबैका लागि नमनकारी भूमि भएको बताए। जनकपुरमा आयोजित नागरिक अभिनन्दन कार्यक्रममा उनले शुरुमा मैथिलीमा र त्यसपछि नेपाल र हिन्दीमा सम्बोधन गरेका थिए।


 

More form the Internet

loading...