नेपाली इन्टरनेट जगतमा के भइरहेको छ ?
नेपालमा इन्टरनेटबारे केही तथ्यहरू
काठमाडाैं, साउन २३–नेपालमा सन् १९९४ देखि इन्टरनेट प्रयोगमा आएको हो। सन् २०१० को एउटा तथ्य अनुसार नेपालमा इन्टरनेट प्रयोगकर्ता कुल जनसङ्ख्याको २३ प्रतिशत छन्। तीमध्ये फेसबुक मात्र प्रयोग गर्नेकाे सङ्ख्या पनि झन्डै कुल जनसङ्ख्याको आधि नै छ । २०१६ को एक आँकडा अनुसार मासिक ५/६ मिलियन नेपालीले फेसबुक प्रयोग गर्छन्।
औसतमा १५ देखि ३५ वर्ष उमेर समूहका मानिस यस सोसियल साइटका प्रयोगकर्ताहरु छन्। तीमध्ये ७७ प्रतिशत प्रयोगकर्ता कलेज लेभलमा अध्ययनरत छन्। युट्युब डटकम नेपालमा सबैभन्दा धेरै हेरिने वेबसाइट हो । नेपाली वेबसाइटमा चाहिँ अनलाइनखबर सबैभन्दा धेरै हेरिने मध्येमा पर्छ। नेपालमा गुगल, फेसबुक, विकिपीडिया, ट्वीटर जस्ता साइट पनि अत्यधिक लोकप्रिय छन्।
विकिपीडियामा जम्मा ६० लाख ७ हजार अाठ सय ८४ वटा पेज नेपाली भाषामा लेखिएका छन्, भने ३२ हजार एक सय ९८ जनाको विकिपीडियामा अकाउन्ट छ । नेपालमा सबैभन्दा बढी प्रयोग हुने मेसेन्जिङ एप फेसबुक मेसेन्जर हो। त्यसपछि भाइबर, इमो आदि पर्दछन्। सबैभन्दा बढी प्रयोग हुने नेपाली एप हाम्रो पात्रो हो। र, यो एप गुगल प्ले स्टोरबाट १ मिलियनभन्दा बढी पटक डाउनलोड भएको छ।
नेपालमा पनि थुप्रै विदेशी साइटलाई रिप्लेस गर्न सक्ने अल्टरनेटिभ साइट छन्। जस्तै: सोसियल मेडियामा सगुन, हाम्रो बुक, मेरो पोस्ट। केमु, हाम्रो बजार, नेप्बे, मुन्चा, एम्पल सपिङ आदि नेपालका चर्चित अनलाइन सपिङ साइट हुन् । ई-सेवा, आइपे, पेबिल आदि साइटबाट सजिलैसँग पैसा पठाउन/पाउन, बिल तिर्न वा सामानहरु खरिद गर्न सकिन्छ ।
फेसबुकमा सबैभन्दा धेरै लाइक भएको पेज ई-कान्तिपुर हो । यसमा ३२ लाखभन्दा बढी लाइक छ भने नेपालको सबैभन्दा धेरै फेसबुकमा लाइक भएकी सेलिब्रेटीमा रेखा थापा हुन् । नेपालको सबैभन्दा धेरै लाइक भएको पेज ई-कान्तिपुरपछि बीबीसी नेपाली आउँछ भने त्यसपछि रेखाको पेज पर्छ । उनको अफिसियल पेजमा ३१ लाखभन्दा बढी फ्याउन जोडिएका छन् ।
सोसियल ब्लेडका अनुसार नेपालमा १२ वटा मात्र युट्युब च्यानल छन् जसमा १ लाखभन्दा माथि सस्क्राइबर छन्। नेपालको सबैभन्दा धेरै सस्क्राइबर तथा सबैभन्दा धेरै भ्यूअर्स भएको युट्युब च्यानल म्युजिक नेपाल हो। जसमा ८ लाखभन्दा बढी सस्क्राइबर र ९ करोड भ्यूअर्स छन्। नेपाली इन्टरनेट इतिहासमा युट्युबमा सबैभन्दा धेरै पटक हेरिएको नेपाली भिडियो सुर्के थैली खै… गीतको म्यूजिक भिडियो हो । जुन १ करोड ८२ लाखभन्दा धेरै पटक हेरिएको छ ।
नेपाली इन्टरनेट जगतमा ह्याकिङप्रतिको मोह अन्य देशको भन्दा बढी नै छ। अझ २०१६ को ह्याकिङ सर्च टर्म हेर्ने हो भने त विश्वमा सबैभन्दा धेरै ह्याकिङ सम्बन्धी जानकारी नेपालबाट सर्च हुने गरेको छ। त्यसमा ‘हाउ टु ह्याक’, ‘वाईफाई ह्याक’, ‘फेसबुक ह्याकिङ’ जस्ता किवर्ड सर्वाधिक प्रयोग भएका छन्।