Suvadin, Home

Cover Image

अाज श्रीकृष्ण जन्माष्ठमीः
पाटनको प्रसिद्ध कृष्ण मन्दिरमा बिहानैबाट भक्तजनको घुइँचो

विसं २०७२ को भूकम्पपछि यो वर्ष मात्रै दर्शनार्थीले मन्दिरभित्र गएर माथिल्लो तलामा रहेको कृष्णको मन्दिरमा दर्शन गर्न पाएका हुन्। भूकम्पबाट क्षति पुगेपछि तीन वर्षसम्म मन्दिरमा पुजारीले पूजा गर्नेबाहेक सर्वसाधारणले भित्र गएर दर्शन गर्न नपाएको पाटन स्मारक संरक्षण तथा दरबार हेरचाह कार्यालयका प्रमुख काजीमान प्याकुरेलले बताए।

ललितपुर, १७ भदाै – पाटनको प्रसिद्ध कृष्ण मन्दिरमा आज बिहानैबाट भक्तजनको घुइँचो लागेको छ।

श्रीकृष्ण जन्माष्ठमीका अवसरमा काठमाडौं उपत्यकाका अधिकांश स्थान र उपत्यका नजिकका जिल्लाबाट दर्शनार्थी यहाँ आउन थालेका छन्। 

विसं २०७२ को भूकम्पपछि यो वर्ष मात्रै दर्शनार्थीले मन्दिरभित्र गएर माथिल्लो तलामा रहेको कृष्णको मन्दिरमा दर्शन गर्न पाएका हुन्। भूकम्पबाट क्षति पुगेपछि तीन वर्षसम्म मन्दिरमा पुजारीले पूजा गर्नेबाहेक सर्वसाधारणले भित्र गएर दर्शन गर्न नपाएको पाटन स्मारक संरक्षण तथा दरबार हेरचाह कार्यालयका प्रमुख काजीमान प्याकुरेलले बताए।

उनले भने, ‘हामीले कृष्णाष्ठमीमा खुला गर्नका लागि केही दिन पहिले मात्रै निर्माण सम्पन्न गरेका थियौं।’ 

कृष्णाष्ठमीका दिनमा वर्षेनी राष्ट्रप्रमुख दर्शनका लागि यहाँ आउने गरेका छन्। राष्ट्रपति विद्यादेवी भण्डारी आज दिउँसो २.३० बजे यहाँ आउने कार्यक्रम तय भएको छ। मन्दिरमा दर्शनका लागि आउने विशिष्ठ पाहुना र दर्शनार्थीको भीडलाई हेरेर सुरक्षा व्यवस्था मजबुत बनाइएको महानगरीय प्रहरी परिसर ललितपुरका प्रवक्ता प्रहरी नायब उपरीक्षक नरेन्द्र चन्दले बताए। 
बिहान २/३ बजेबाट नै दशनार्थी मन्दिर आइपुगेका थिए। बिहानीपखबाट भीड बढ्दै गएको चन्दले बताए।

एक पटकमा ८/१० जनासम्म दर्शनार्थीभित्र जाने गरी व्यवस्था मिलाइएको छ। उनले भने, ‘बिहानसम्म एक/दुई घण्टामा फर्कन मिल्ने थियो, भीड बढ्दै जाँदा दर्शन गर्न बढी समय लाग्ला।’

गाबहालदेखि सुन्धारासम्म सवारी साधन चल्न दिइएको छैन । 

नेपाल प्रहरीसँगै नेपाल स्काउट र विभिन्न सङ्घ–संस्थाका स्वयंसेवक दशनार्थीको सहयोगका लागि खटिएका छन्। दर्शनार्थीलाई स्वास्थ्य समस्या आउँदा तत्काल उपचारका लागि स्वास्थ्य संस्था यस क्षेत्रमा खटिएका छन्। 
मन्दिर पुनर्निर्माणको क्रममा धेरै निर्माण सामग्री पुरानै प्रयोग भएको दरबार हेरचाह कार्यालयका प्रमुख प्याकुरेलले बताए।

यहाँ भएका फुटेर वा मक्किएर प्रयोग गर्न नमिल्ने अवस्थामा भएका सामग्रीबाहेक अरुलाई मर्मत गरेर प्रयोगमा ल्याइएको छ। 
विश्व सम्पदा सूचीमा सूचीकृत पाटन दरबार क्षेत्रमा रहेका स्मारकमध्ये कृष्ण मन्दिरलाई महत्वपूर्ण मानिन्छ। ढुङ्गै–ढुङ्गाले बनेको कृष्ण मन्दिरलाई शिखर शैलीको उत्कृष्ट नमूनाका रूपमा मानिन्छ । मन्दिरमा २१ गजुर रहेका छन्। 

१७ औं शताब्दीमा पाटनका राजा सिद्धिनरसिंह मल्लले यो मन्दिरको निर्माण गर्न लगाएका थिए। उनले कृष्ण मन्दिर बनाउनेसँगै कृष्ण लीलामा आधारित नाच सञ्चालन गरेका थिए। जसलाई कात्तिक नाच पनि भनिन्छ।

कृष्ण मन्दिर तीन तला रहेको छ। बीचको तलामा कृष्णको मूर्ति रहेको छ। मूर्तिको वरिपरि विष्णुका १० अवतार मूर्ति छन्। मन्दिरका थामहरूमा विभिन्न देवी–देवताको मूर्ति कुँदिएको छ।
 


 

More form the Internet

loading...