युनिभर्सिटी कपः शंकरदेव र कमर्श क्याम्पस विजयी
काठमाडाैं, चैत २४ - काठमाडौंमा जारी युनिभर्सिटी कप अन्तर्गत बिहीबार भएको पहिलो खेलमा शंकरदेव क्याम्पसले सेन्ट लरेन्स कलेजलाई ४९ रनले पराजित पारेको छ।
टस जितेर पहिले ब्याटिङ गरेको शंकरदेवले निर्धारित २० ओभरमा ७ विकेट गुमाएर १ सय ६३ रन बनायो। जसमा आयुष्मान बमले सर्वाधिक ६१ रनको अर्धशतकीय पारी खेले। त्यस्तै, सोमेस यादवले ३५ तथा अरुण ऐरी र रविन चन्दले समान १६ रन बनाए।
सेन्ट लरेर्सका इशान सिंह बानियाँले ३ तथा अभिशेष थापाले २ विकेट लिए।
जवाफी ब्याटिङमा सेन्ट लरेन्सले १८.४ ओभरमा सबै विकेट गुमाएर १ सय १४ रन मात्र बनाउन सक्यो। उसका लागि अमित श्रेष्ठले ३२, प्रसुन थापाले २१ तथा अविशेष थापाले १८ रन जोडे।
शंकरदेवका लागि प्रकाश विष्टले, आशिष पोखरेल, लोकेश धामी र विनोद भट्टराईले समान २ विकेट लिए।
त्यस्तै, दिउँसो भएको अर्को खेलमा नेपाल कमर्श क्याम्पसले कसमस कलेजलाई ८ विकेटले पराजित गरेको छ। टस जितेर पहिले ब्याटिङ गरेको कसमसले १४.४ ओभरमा सवै विकेट गुमाएर ६७ रनमात्र बनाउन सक्यो। जवाफी ब्याटिङमा नेपाल कमर्श क्याम्पसले ६.३ ओभरमा २ विकेट गुमाएर लक्ष्य भेटायो।