गजलः फूल र मालीको कथा यौटै कहाँ छ र?
साबित्रा लुइँटेल घिमिरे
फूल र मालीको कथा यौटै कहाँ छ र?
ओठ र लालीको कथा यौटै कहाँ छ र?
पोल्छ छाती भोकमरीमा पर्दा उता,
भेरी कर्णालीको कथा यौटै कहाँ छ र?
बस्ने धर्ती अनि आकाश एकै भा'नि
सबै नेपालीको कथा यौटै कहाँ छ र?
चम्कियो विश्वभरि गाथा बोकी वीरताको
तर, गोर्खालीको कथा यौटै कहाँ छ र?
रंग भेदको छ अझै पनि पीडाहरू
गोरी कालीको कथा यौटै कहाँ छ र?
-बिर्तामोड, झापा